ഫ്രാന്‍സിസ് എന്ന കച്ചവടക്കാരന്‍ സന്തോഷവാനല്ല , കാരണം കച്ചവടത്തില്‍ വിജയിച്ചിട്ട് ഉണ്ടെങ്കിലും തന്റെ വിദ്യാഭ്യാസ പശ്ചാത്തലം മോശമായത് കൊണ്ട് ആളുകള്‍ തന്നെ ബഹുമാനിക്കുന്നില്ല എന്നതില്‍ ദുഖിക്കുന്നു. ഇത് മാറ്റുവാന്‍ വേണ്ടി ഒരു ഉയര്‍ന്ന പുരസ്കാരം കിട്ടാന്‍ വേണ്ടി ഫ്രാന്‍സിസ് ശ്രമിക്കുന്നു. ഈ ശ്രമങ്ങളെ നര്‍മത്തിന്റെ മേമ്പൊടിയോടെ ഇവിടെ അവതരിപ്പിക്കുന്നു.
സംവിധായകന്‍ എന്ന നിലയില്‍ രഞ്ജിത്ത് നല്ല പ്രകടനം കാഴ്ച വെയ്ക്കുന്നു. ഫ്രാന്‍സിസ് പുണ്യാളന്‍ ഫ്രാന്‍സിസ് കച്ചവടക്കാരനോട് സംസാരിക്കുന്ന രംഗങ്ങള്‍ നല്ല രീതിയില്‍ ചിത്രികരിച്ചവയാണ് . എങ്കിലും ചില രംഗങ്ങളില്‍ പുണ്യാളന്‍ ആയി അഭിനയിച്ച നടന്‍ പ്രതീക്ഷയ്ക്ക് ഒത്ത് ഉയരുന്നില്ല . ഈ സിനിമയുടെ ഏറ്റവും നല്ല രംഗമായി തോന്നുന്നത് പുരസ്കാരം കിട്ടാന്‍ വേണ്ടി ഫ്രാന്‍സിസിന്റെ മതമൈത്രി സ്നേഹം പെരുപ്പിച്ചു കാണിക്കുന്ന രംഗമാണ് . പുരസ്കാരത്തിന് വേണ്ടിയുള്ള ഫ്രാന്‍സിസിന്റെ ശ്രമങ്ങളെ അവലംബിച്ച് കൊണ്ടുള്ള രംഗങ്ങള്‍ ഉന്നത നിലവാരം പുലര്‍ത്തുന്നു . എന്നാല്‍ ഫ്രാന്‍സിസിന്റെ പ്രേമം ഭാഗം വരുന്നതോടെ സിനിമയുടെ ഒഴുക്ക് നഷ്ടപ്പെടുന്നു . നല്ല ചില മുഹൂര്‍ത്തങ്ങള്‍ ഇവിടെ ഉണ്ടെങ്കിലും നേരത്തെ കാണിച്ച സ്വാഭാവികത ഇവിടെ നഷ്ടപ്പെടുന്നു. ഇതിനു ശേഷം പ്രതിഭാശാലിയായ കുട്ടിയുടെ ആഗമനം സിനിമയെ വീണ്ടും നിലവാരത്തകര്ച്ചയിലേക്ക് നയിക്കുന്നു. ഈ കുട്ടിയുടെ അഭിനയം വളരെ അരോചകമായി തോന്നി. ജഗതിയുടെ കഥാപാത്രം ഏച്ച് കെട്ടിയത് പോലെ തോന്നുന്നു , തമാശരംഗങ്ങള്‍ നിലവാരം പുലര്‍ത്തുകയും ചെയ്യുന്നില്ല . കുട്ടിയുടെ പ്രതിഭ വെളിവാക്കാന്‍ കാണിച്ച സംഭവങ്ങള്‍ ബാലിശമായി തോന്നി .
മേല്‍ കാണിച്ചത് പോലെ ഈ സിനിമയില്‍ ന്യുനതകള്‍ ഉണ്ടെങ്കിലും മൊത്തത്തില്‍ ഇത് ഒരു നല്ല സിനിമയാണെന്ന് പറയാം .മമ്മൂട്ടി ഈ കഥാപാത്രത്തെ ഉള്‍ക്കൊണ്ട്‌ അഭിനയിക്കുന്നതില്‍ വിജയിച്ചിരിക്കുന്നു . ഉന്നത നിലവാരം പുലര്‍ത്തുന്ന ആക്ഷേപഹാസ്യം സിനിമയുടെ ഭാഗമാക്കുന്നതില്‍ രഞ്ജിത്ത് വിജയിച്ചിട്ടുണ്ട് . ഇന്നസെന്റ്‌ ,പ്രിയമണി,സിദ്ദിക് എന്നിവര്‍ തങ്ങളുടെ ഭാഗങ്ങള്‍ നന്നാക്കിയിട്ടുണ്ട് .
എന്റെ അഭിപ്രായം : നല്ലത്
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ